TIMOR-LESTE NIA ADEZAUN BA WTO: INDEPENDENSIA OU DEPENDENSIA BA KAPITAL GLOBAL?

Bainhira desidi tama WTO, katak desidi hodi submete no subjuga ba globalizasaun imperialista kapitalizmu. Simu kapital global, katak simu hodi rekoloniza fila-fali. Imperializmu refere ba politika relasaun estruktural entre Norte ho Sul ne’ebe lori ba impozisaun ‘income deflation’ husi Norte ba Sul atu bele mantem nafatin valorizasaun ba osan, presu no ‘valor’ iha sentru, prezerva kiak no impase iha Sul.

Credit: ABC News

---

Artigu hakerek husi Renato da Costa iha media Neon Metin, dehan tama WTO, Timor sei hetan bensaun lubun wain (tratamentu diak, asesu merkadu, hasae produtividade, halo Timor sai kompetetivu nst). Ne’e interesante tebes maske nem aprezenta analiza rigorozu ou empiriku ruma. Saida mak iha, mak fiar diluzaun ba testu mamuk no reduksionismu ne’ebe sustenta husi disiplina ekonomia, ka politika ekonomia borjuista (Adam Smith, Ricardo nst) nian ne’ebe, Karl Marx kritika tomak ba sira nia irasional, konformismu no eru. Hakerek ne’e laos ho objetivu atu responde ba artigu ne’eba, maibe hodi kontra-atake deit iluzaun iha konsensus publiku ne’ebe domina Timor durante ne’e.

Ita nia foinsa’e estudante matan-tomak ne’ebe estuda ekonomia, kompletamente fase ho dutrina ekonomia Laissez faire, iha ne’ebe, Adam Smith, David Ricardo, John Keynes, Milton Friedman, to’o ba politika-nain hanesan Ronald Reagan ou Margaret Thatcher, figura rua ba protagonista ekonomia neoliberalizmu nudar sira nia maromak daruak iha mundu ne’e – no sira Leninista liu eskerda sira, tan bainhira fila husi estudu iha liur ba rai orijin, sira sei sai militante fundamentalismu ba ideia merkadu kapitalismu, neoliberal, austeriade nst.

Sira ‘policy-analysis’ ou ‘ekonomista’ sempre dehan Timor bainhira tama ba Organizasaun Mundial Komersiu (ou WTO iha lian Ingles), maka sei hetan benefisiu barak iha tratamentu husi rejime komersiu WTO nian. Desde babain ona, mahein ba ‘public policy’ sira ne’e sempre redus diskusaun ba vantajem no desvantajem kona-ba saida deit mak Timor atu adere ba instituisaun ou rejime ordem ekonomia (tantu finansial no komersiu) internasional to’o ba organizasaun regional hanesan ASEAN.

Husi ne’e, prevene ita nia analiza kritiku, no ho konsekuensia, nia redus deit diskusaun iha plataforma Arentdiana good ho lesser evil, ou diak hasoru ladiak deit duke lori ita ba hare’e hetan konflitu entre klase exploitador no exploitadu: kapitalista ho traballador, imperialista ho povu subjugadu no reaksionariu hasoru revolusionariu nst. – ou ne’e prevene ita hotu hodi hatene katak, afinal baze ekonomia kapitalizmu ne’e determina no domina ita nia nia instituisaun politika, ideia ou gostu sex.

Diluzaun husi disiplu ekonomia no dezenvolvimentu borjuista ne’e nian, relasiona tebes ho ekonomia global, entre ne’e mos komersiu. Ba sira, komprende ekonomia atual nudar merkadu livre ne’ebe iha kbiit maksoi hodi hasai umanidade ou Timoroan husi kiak, dezigualdade no dezempregu. Ba sira, ita hotu sei benefisia husi globalizasaun agora nian. Ba sira, kapitalismu ne’e aseitavel, normal, no natureza umanu nian ona, maibe laos nudar etapa istoriku ne’ebe bele hakuur liu husi luta politiku emansipatoriu, lidera husi proletariadu (traballador nst) rasik.

Kapitalismu nudar sistema universal, no nia korenti exploitasaun ne’e global. Iha nia laran, nakonu ho dezenvolvimentu dezigual, katak riku iha Norte, tenki sosializa kiak iha Sul – empregu iha Sentru, tenki mantem dezempregu absoluta no masal iha mundu Sul.

Ba sira, maske kapitalismu ne’e destrui nia fonte rua, traballador no ambiente, maibe imposivel hodi harahun kapitalismu. Sira dehan, ita so bele mak jere deit kapitalismu, ou transforma kapitalismu nia monstrous ne’e sai ema: ezemplu green economy. Sira nia mestri bo’ot mos mak Samuel Stiglitz ne’ebe propoem deit ‘alter-capitalism’, katak atu globalizasaun kapitalismu ne’e servisu diak no benefisia ema hotu, laos deit kapitalista maibe mos traballador ou toos-nain sira iha nasaun Mundu Sul (Periferiu ou ninin) sira. Kapitalismu labele reforma, so bele destrui liu husi revolusaun sosial, no internasional. La hakur no reforma deit, extinsaun planetariu hanesan Greta Thunberg hateten, besik ona iha ita nia matan-laran.

Ba ita, globalizasaun nudar naran ne’ebe falun tiha karater ekonomia global iha mundu ne’ebe bolu imperialismu. Ita nia maluk ekonomista sira ne’e nunka temi ou bele deit nunka rona naran imperialismu, saida mak imperialismu, maske iha inu nasional Timor nian ne’ebe temi bebeik hela ‘Abaixo imperialismo’, maibe iha realidade konkretu, ita subjugadu hela ba imperialismu (utiliza US Dollar, fundu petroliferu iha merkadu finansieru kontrola husi Amerika, Banku ADB kontrola husi Japaun ne’ebe fo debe Timor nst).

Kapitalismu nudar sistema universal, no nia korenti exploitasaun ne’e global. Iha nia laran, nakonu ho dezenvolvimentu dezigual, katak riku iha Norte, tenki sosializa kiak iha Sul (pais subdezenvovidu, super-exploitadu sira) – empregu iha Sentru, tenki mantem dezempregu absoluta no masal iha mundu Periferiu/Sul. Hodi funsiona kapitalismu, tenki iha dezempregu, atu bele iha traballador baratu, atu bele iha valorizasaun ba osan, no supa valor-resin (surplus value, profit) ne’ebe masal liu tan ba kapitalista iha Sentru. Laos dezempregu Timor halai ba servisu baratu iha Inglatera, Australia, Korea nst manifesta hela karater ekonomia imperializmu ne’e?

Kondisaun hanesan, aplika mos ba komersiu. Esensia husi ekonomia imperialista maioria nafatin hanesan Lenin karateriza nudar monopoly, ou kapital finansial. Maske nune’e, ita agora iha ona faze kualitativu foun imperializmu nian, no ne’e tuir Samir Amin, ekonomista Marxista husi Ejiptu ne’e bolu ‘generalized monopolies’.

Relasiona ho karater kualitativu foun ne’ebe, imperializmu tuir Utsa Patnaik, funsiona ho aspetu tolu ne’ebe sentral: increasing supply prices; value of money; income deflation. Mekanismu reprodusaun global, ou transferensia valor husi Mundu Sul ba Mundu Norte liu husi prezervasaun mekanismu tolu ne’e. Katak, imperialismu tenki asesu bebeik merkadu no material prima iha pais terseiru mundu ho baratu – katak, pais sentru laiha produtu neebe abundante duke Mundu Sul – diferensia entre Sul ho Norte kona-ba klima no jeografia hatudu katak, Sul ne'ebe masa tropikal, iha produtu ne'ebe Norte laiha no depende ba - dalan uniku atu mantem Norte superior mak tenki asesu, domina no kontrola Sul.

Tan ne’e, hodi valoriza osan no ‘valor’ iha pais sentru kapitalista sira maka, material prima tenki fan ho presu baratu. Tan ekonomia kapitalismu sempre loke dalan ba folin sae (inklui nesesidade sae nst) tan akumulasaun kapital ezizi produtu no produsaun sae ba bebeik. Atu bele iha estabilidade osan no valor iha Sentru, maka presu lebele sujeitu ba sae – Karik ne’e akontese, sei destabiliza kedas valor iha sentru, presu sei sae makas iha pais kapitalista avansadu sira. Bainhira presu sae, laos deit ameasa ba valor osan, maibe sistema monetariu tomak ne’ebe daudaun ne’e kontrola husi oligarkia finansial iha pais membru ‘collective triad’ hanesan EUA, Japan no Europa.

Hodi hakur impase no kontradisaun ne’e, dalan ba imperialismu mak tenki asegura atu nasaun Sul sira tenki kiak no dependensia bebeik ba Norte. Bainhira akontese ‘increasing price’ ne’ebe sei destabiliza value of money, maka dalan uniku mak tenki mantem nafatin ‘income deflation’ iha Mundu Sul sira.

Kazu konkretu ba income deflation, hatudu bebeik ona. Toos-nain Ermera riku fulan tolu, no kiak fulan sia. Ita nia toos-nain kiak no mal-nutrisan iha Ermera mak produs kafe, no folin determina husi merkadu global. Rikusoi husi produtu ne’ebe toos-nain Ermera produs sulin hotu ba Sentru (empreza CCT nst nia bolsu no estadu Norte). Ita produs kafe, laos ba konsumu nasional maibe ita sosa fali kafe husi rai seluk – ne’e ezemplu simples, ke refleta tomak husi relasaun estrutural Sul ho Norte. Ne’e mos mak lojiku husi ‘global law of value’, korenti exploitasaun global. Extraksaun valor masivu mak husi Sul hanesan Timor ba Norte.

Hodi kria income deflation iha Sul, pasu austeridade (aperta kartera) no konsesaun (ba taxa) mos nudar estratejia hodi asegura prosesu ne’e. Politika disiplina fiskal iha Timor, hatudu iha redusaun orsamentu drastiku no sistematiku ba setor agrikultura lao konsistente durante tinan sanulu ikus ne’e. Ironiku liu, foin lalais, ofisial estadu dehan, agrikultura laos fonte ba rendimentu nasaun atu bele sadere moris ba – no ba sira, estadu Timor iha papel deit hodi transforma Timor nia ekonomia ba iha ekonomia ho baze servisu ou sai operador Turismu ba turista Osidente. Ne’e katak, hases husi dependensia ba mina-gas atu kontinua iha dependensia deit ba kapital global.

Sorin seluk, proponente happy globalization ou benefisiu tama ba WTO dehan, karik adere, ita sei hetan benefisiu husi komersiu sira ne’ebe ikus sei eleva produsaun rai-laran, transferensia teknolojia no halo Timor sai kompetetivu. Sira haluha katak, iha ekonomia kapitalismu ne’e, kompetisaun bele iha, maibe ne’e subjuga ba monopoliu, ka Samir Amin bolu Imperialist Rent. Iha ekonomia atual, la ezisti merkadu livre, so iha mak anarkia iha ditadura borjuista iha kada pais, kada rejiaun no capitalista finansial husi pais Sentru ne’ebe monopoliu tomak: asesu ba material prima, kontrola no domina merkadu mundial; monopoliu ba teknolojia, media komunikasaun inklui direitu intelektual; poder militar nst.

Bainhira integra ba kapitalismu global, merkadu livre, laos katak ita atu kompete livre. Katak, ne’e laos deit loke dalan ba kapital global kontrola no asesu merkadu nasional ou sasan baratu no supa valor, maibe mos kria baze produsaun ne’ebe laos serve ba konsumu nasional maibe exporta ba merkadu global (produsaun kafe, serveza nst). Capital mai atu valoriza nia an, laos atu tulun Timor sai husi nia kondisaun mizeravel no impase.

Argumentu ne’ebe dehan, tama WTO bele hasae produtivu ne’e sala, tamba estratejia husi imperialismu nia income deflation maka atu mantem nafatin ‘deindustrializasaun’, mantem kapitalismu ne’ebe impase iha Sul – tamba Timor nunka too iha faze industrializasaun, maka ne’e laos buat foun tamba sistema kapitalismu global ezizi atu mantem Timor iha nia pozisaun impase nune’e. Ne’e katak, kontradisaun no antagonismu nudar esensia husi kapitalismu global, ka imperialismu. To’o iha ne’ebe deit, pais iha Mundu Sul nunka bele atinji ka duni hetan estadu kapitalista avansadu. Imperializmu nia funsaun mak tenki mantem subdezenvolvimentu Mundu Sul nian – asegura atu kiak no dezempregu la diminui iha Mundu Sul.

Tan ne’e, bainhira desidi tama WTO, katak desidi hodi submete no subjuga ba globalizasaun imperialista kapitalizmu. Simu kapital global, katak simu hodi rekoloniza fila-fali. Imperializmu refere ba politika relasaun estruktural entre Norte ho Sul ne’ebe lori ba impozisaun ‘income deflation’ husi Norte ba Sul atu bele mantem nafatin valorizasaun ba osan, presu no ‘valor’ iha sentru, prezerva kiak no impase iha Sul.

Iha tinan 1975, bainhira desidi atu retira FRETILIN husi dialogu fantoche iha Macau kona-ba prosesu deskolonizasaun Timor, iha ne’eba, involve UDT no mos APODETI nudar liman-ain Indonezia. Grande Nicolau Lobato dehan katak, kada solusaun neokolonializmu sempre loke odamatan ba imperialismu. Hanesan George Aditjondro hateten, desde 1999, Timor nakfilak sai postu global ba kapital iha Azia, no desde ne’e kedas, ita reafirma ita nia submisaun ba imperialismu, katak subjugadu ba ordem imperialismu global. Husi nee ba oin, ita promove bebeik dehan Timor nia demokrasia kapital ne’e mak diak liu iha Sudueste Aziatiku, demokrasia ne’ebe lori Timor submete no subjuga ba imperializmu ne’e mak sira dehan ‘diak’ los ne’e.

Ita presiza rekonstrui ekonomia nasional ne’ebe popular, no rezisti presaun no demanda kapital global. Ekonomia nasional ne’ebe ubriga kapital global ajusta ba demanda nasaun terseiru mundu nian. Sem ne’e, partisipa iha komersiu global, ou integra ba iha kapitalismu global laos atu lori ita ba independensia ekonomia maibe ba dependensia tomak.